ఆర్‌సీబీకి గట్టి షాక్.. గాయంతో జ‌ట్టును వీడి స్వదేశానికి పయనమైన స్టార్ ఓపెనర్

ఐపీఎల్ 2026లో డిఫెండింగ్ ఛాంపియన్‌గా బరిలోకి దిగి మంచి ప్రదర్శన చేస్తున్న రాయల్ ఛాలెంజర్స్ బెంగళూరు (ఆర్‌సీబీ) జట్టుకు గట్టి ఎదురుదెబ్బ తగిలింది. ఆ జట్టు స్టార్ ఓపెనర్ ఫిల్ సాల్ట్ గాయం కారణంగా స్వదేశం ఇంగ్లండ్‌కు తిరిగి వెళ్లాడు. చేతి వేలి గాయానికి సంబంధించిన స్కానింగ్, తదుపరి వైద్య పరీక్షల నిమిత్తం అతను ఇంగ్లండ్‌కు పయనమైనట్టు తెలుస్తోంది.

ఏప్రిల్ 18న ఢిల్లీ క్యాపిటల్స్‌తో జరిగిన మ్యాచ్‌లో ఫిల్ సాల్ట్ గాయపడ్డాడు. బెంగళూరులోని చిన్నస్వామి స్టేడియంలో బౌండరీ ఆపే ప్రయత్నంలో డైవ్ చేయగా, అతని ఎడమచేతి వేలికి గాయమైంది. ఈఎస్‌పీఎన్ క్రిక్‌ఇన్‌ఫో కథనం ప్రకారం, ఇంగ్లండ్ క్రికెట్ బోర్డ్ (ఈసీబీ) సూచన మేరకే సాల్ట్ స్వదేశానికి వెళ్లాడు. ఈ గాయం కారణంగానే అతను గత మూడు మ్యాచ్‌లకు దూరమయ్యాడు.

ఈ సీజన్‌లో ఫిల్ సాల్ట్ అద్భుతమైన ఫామ్‌లో ఉన్నాడు. ఆడిన 6 ఇన్నింగ్స్‌లలో 168.33 స్ట్రైక్ రేట్‌తో 202 పరుగులు చేసి జట్టు విజయాల్లో కీలక పాత్ర పోషించాడు. సాల్ట్ స్థానంలో ప్రస్తుతం విరాట్ కోహ్లీతో కలిసి మరో ఇంగ్లండ్ ఆటగాడు జాకబ్ బెథెల్ ఇన్నింగ్స్ ప్రారంభిస్తున్నాడు.

గాయం తీవ్రతను బట్టి సాల్ట్ తిరిగి వచ్చే అవకాశం ఉంటుందని, అప్పటివరకు అతని స్థానంలో వేరొకరిని తీసుకునే ఆలోచన ఫ్రాంచైజీకి లేదని సమాచారం. ప్రస్తుతం పాయింట్ల పట్టికలో పంజాబ్ కింగ్స్ తర్వాత రెండో స్థానంలో ఉన్న ఆర్‌సీబీ, తన తదుపరి మ్యాచ్‌ను లక్నో సూపర్ జెయింట్స్‌తో గురువారం ఆడనుంది.